'Mental Health Care Act' nais paigtingin ni Deputy Speaker Loren Legarda

𝘿𝙚𝙥𝙪𝙩𝙮 𝙎𝙥𝙚𝙖𝙠𝙚𝙧 𝙇𝙤𝙧𝙚𝙣 𝙇𝙚𝙜𝙖𝙧𝙙𝙖, 𝙣𝙖𝙞𝙨 𝙥𝙖𝙞𝙜𝙩𝙞𝙣𝙜𝙞𝙣 𝙖𝙣𝙜 𝙈𝙚𝙣𝙩𝙖𝙡 𝙃𝙚𝙖𝙡𝙩𝙝 𝘾𝙖𝙧𝙚 𝘼𝙘𝙩

Nais pang paigtingin ng dating Senadora at ngayo’y Deputy Speaker na si Loren Legarda ang Mental Health Care Act (MHCA) matapos nitong makita ang pagtaas ng numero ng mga nagpapakamatay sa bansa.

Ayon sa kaniyang pahayag noong Lunes, kinakailangang ibigay ng gobyerno ang lahat ng makakaya nito upang matulungan ang mga Pilipinong nasa hindi maayos na kalagayan, lalo na ang may mga problema sa kanilang kalusugang mental ngayong pandemya.

Nabahala ang dating senadora sa biglaang pagtaas nang hanggang 57 porsiyento ng numero ng nagpapakamatay noong 2020 kumpara noong 2019.

Aniya, sa pandemyang ating kinakaharap sa ngayon, kinakailangan din nating alagaan ang ating kalusugang mental upang mabuhay.

Dagdag pa niya, ang Republic Act 11036, isa sa mga batas na kaniyang inihain, na tumutukoy sa Phillippine Statistics Authority data na nagpapakita ng suicide incidents ay makatutulong at mapakikinabangan sa pagharap sa mga pagbabago na bunsod ng krisis na kinakaharap ng bansa sa kasalukuyan.

Ayon sa kaniya, sa kabilang pagpapabuti ng kamalayan ukol sa kalusugang mental ay isa pa rin ito sa mga aspetong madalas na hindi iniintindi ng mga awtoridad at sa ating lipunan.

Matagal nang nababahala ang mga eksperto na magiging sanhi ng problema sa kalusugang mental ng mga tao ang pandemya. Lalo pa’t sa mga nagdaang lockdowns, napilitang manatili sa kani-kanilang tirahan ang mga tao na siya ring naging dahilan kung bakit ang iba ay nakararanas ng pang-aabuso.

Nabanggit din ng Department of Education na isa rin ang kalusugang mental sa kanilang mga pangunahing inaalala sa paglipat sa online learning.

Ang ilang problema sa online class ay sanhi ng kawalan o kakulangan ng pakikipag-ugnayan ng mga guro at estudyante, gayundin ang pagkabigo ng mga estudyante dahil sa hindi nakaya ang financial demands sa virtual learning.